艺人杨明与女友庄思明2月10约下午3时多，齐齐戴住口罩同帽、推住3个行李箱及大袋现身机场抵港大堂。他们表示从日本返港，总共去了十日，讲到现时新冠肺炎疫情严峻，问到之前可有想过取消行程？杨明说：“冇，都会照去，上年12月已经Plan咗。”庄思明说：“啱啱喺飞机上面全程都戴口罩同消毒，尽量唔去厕所。”
问到今次旅程有周围去扑口罩？杨明无奈说：“成个旅程嘅重心都系揾口罩，好难买，所以就算见到花粉口罩都买住先。（自己有口罩存货？）冇囤积，但都买咗啲畀公司，佢哋一日都要用几十个，一定要有足够货源。（有加强炖汤店员工嘅防御措施？）有，有畀埋洗手液，除咗食饭之外，全程佢哋都要戴口罩。”庄思明又指之前都有于家乡马来西亚订口罩，不过都唔成功：“妈咪托人买都买唔到，好多朋友仲去更偏僻嘅地方揾，例如南非，因为啲热门地日本、韩国都冇，去日本药妆店一只都揾唔到。”
疫情令市道转差，讲到就连张敬都宣布由他投资经营的饼店暂停营业，杨明闻言极为错愕，问到可有影响他的炖汤店生意？他坦言都有：“少咗人喺街上面行走，市面都静咗好多，之前受社会运动问题影响、再到疫情，真系伤上加伤，有啲食肆、零售业都好辛苦。（之前被连番追击，舖头有危机？）好彩暂时都OK，顶到吓，有冇钱赚就其次，但都仲有好多市民支持，掹掹紧就收紧开支。（再系咁有谂过结束分店？）暂时未有呢个谂法。”
